ملګرو ملتونو ویلي چې په تېرو ۸۰ کالو کې یې د سولې د ټينګښت، د انساني کرامت د خوندیتوب او برابرۍ په برخه کې فعالیت کړی دی.
نوموړي سازمان یکشنبه د نومبر پر ۲۳مه راپور ورکړی چې بېوزلو ته د خوړو په برابرولو، بحرانونو ته د ځواب ویلو او له بشري حقونو د دفاع په څېر اقداماتو سره یې د میلیونونو وګړو ژوند ژغورلی او له بېلابېلو ټولنو یې ملاتړ کړی دی.
د راپور له مخې، د ملګرو ملتونو څه باندې ۷۰ زره سوله ساتي ځواکونه په ۱۱ نړیوالو ماموریتونو کې فعال دي څو په بېلابېلو سیمو کې سولې او امنیت ته وده ورکړي.
ملګرو ملتونو زیاته کړې چې هر کال نویو زېږېدلو او ماشومانو ته د واکسین خدمات برابروي او په خپلو کړنو یې د څه باندې درېیو میلیونو کسانو ژوند ژغورلی دی.
نوموړی سازمان وايي چې د بشردوستانه خدماتو په دوام، ۱۲۳ میلیونو وګړو ته خواړه او اړتیا وړ مرستې وړاندې کوي.
ملګرو ملتونو زیاته کړې چې د ۸۰ معاهدو او اعلامیو له لارې یې بشري حقونه ترویج کړي او هڅه کوي د نړۍ په ګوټ ګوټ کې برابري او انساني کرامت خوندي کړي.
