۸صبح، کابل: په افغانستان کې د ملګرو ملتونو د بشري استوګنې پروګرام (UN-Habitat) ویلي چې د تاریخي اثارو لکه د هرات د جامع جومات ساتنه د ښارونو د هویت په خوندي کولو کې مهمه ونډه لري.
نوموړي پروګرام شنبه د لیندۍ پر ۲۹مه په خپله اېکس پاڼه کې د ښارونو د هویت د خوندي کولو په موخه د تاریخي اثارو پر ساتنې ټينګار کړی دی.
ملګرو ملتونو زیاته کړې چې د هرات جامع جومات څه باندې ۸۰۰ کاله وړاندې جوړ شوی دی.
یاد سازمان ویلي چې د هرات جامع جومات د افغانستان «غوره حیرانونکې» اسلامي ودانۍ او په مرکزي اسیا کې له تر ټولو لویو اسلامي ودانیو څخه شمېرل کېږي.
افغانستان د هغو هېوادونو په کتار کې دی چې بډایه او متنوع کلتوري او تاریخي اثار لکه لرغونې ودانۍ، زاړه جوماتونه، کلاګانې، زیارتونه او نور لري چې د هېواد د ملي هویت او اوږد تاریخ ښکارندوي کوي.
