یو شمېر استادانو، څېړونکو او د بشري حقونو فعالانو د اوټاوا پوهنتون په یوه غونډه کې د افغان ښځو بشري حقونو ته د نړیوالې ټولنې د پاملرنې پر محدودېدو نیوکه وکړه.
دا غونډه دوشنبه د لړم پر ۱۸مه، د افغانستان لپاره د ملګرو ملتونو د بشري حقونو شورا د ځانګړي راپور ورکوونکي ریچارډ بېنېټ په ګډون جوړه شوې وه.
په دې غونډه کې د بشري حقونو وضعیت، سیاسي ځپنه، تبعیض او د افغانستان د ناورين په تړاو د نړیوالې ټولنې مسوولیتونه وڅېړل شول.
ګډونوالو د ښځو حقونو، د څنډې ته شوو ټولنو د وضعیت او له طالبانو سره د نړیوالو بنسټونو د چلند په اړه د نړیوالې ټولنې د پاملرنې پر محدودېدو نیوکه وکړه.
هغوی په افغانستان کې د بشري حقونو د ناورين پر هر اړخیزې څېړنې او د نړیوالو بنسټونو د ځوابویلو د بهیر پر پیاوړتیا ټینګار وکړ.
بېنېټ د پنجشېر وضعیت ته په اشارې سره، د دې سیمې پوځي کېدل هم له هغو موضوعاتو وبلل چې باید ورته پاملرنه وشي.
هغه همداراز د کانونو د راایستلو د چارو پر چاپېریالي پایلو او طبیعي سرچینو ته د ښځو پر لاسرسي ټینګار وکړ.
د ماشومانو خوارځواکي او د بشري مرستو دوام هم په دې غونډه کې د بحث نور موضوعات وو.
