د امریکا د مرکزي قوماندانۍ مشر سوریې ته تللی

د امریکا د مرکزي قومندانۍ یا سینټکام قوماندان جنرال مایکل ایرک کوریلا سوریې ته سفر کړی دی.

د امریکا مرکزي قومندانۍ په یو بیان کې ویلي چې کوریلا پنج‌شنبه د جنورۍ پر ۱۶مه، سوریې ته تللی او هلته یې له پوځي قوماندانانو، امریکایي ځواکونو او همداراز د داعش ضد په نړیوال ایتلاف او د سوریې دیموکراتیکو ځواکونو (SDF) کې د امریکا پوځيانو شریکانو سره لیدلي دي.

د امریکا مرکزي قوماندانۍ زیاته کړې چې د دغه سفر موخه په سوریه کې د داعش او ترهګرو ډلو د بیاراپورته کېدو د مخنیوي لپاره د هڅو په تړاو خبرې کول و.

له جنرال کوریلا سره په دې سفر کې د CJTF-OIR قوماندان جنرال کیون لیهي او د CSOJTF-L قوماندان جنرال مایکل بروکس هم ملګري وو.

د امریکا مرکزي قوماندانۍ ویلي چې کوریلا د سوریې په شمال ختیځ کې د الهول کډوالو کمپ څخه هم لیدنه کړې ده.

دا د بشارالاسد رژیم له نسکورېدو او د هیئت تحریر شام ډلې له واکمنېدو وروسته سوریې ته د سنټکام د قوماندان لومړنی سفر دی.