۸صبح، کابل: د «افغان جګړې کمېسیون» ګډو مشرانو شمیلا چودري او کالین جکسن د امریکا د کانګرس له خوا د یوه بل کال لپاره د دغه کمېسیون د ماموریت د غځولو خبر ورکړی دی.
دغه کمېسیون پنجشنبه د وږي پر ۵مه، په یوه اعلامیه کې ویلي چې د ماموریت یو کلن غځېدل به د افغانستان د ۲۰ کلنې جګړې د هر اړخیزې، خپلواکې او کره ارزونې د بشپړولو لپاره اړین وخت برابر کړي.
د اعلامیې له مخې، د دغه کمېسیون د ماموریت غځول د امریکا د کانګرس د دواړو جرګو او د جمهوريپالو او ډیموکراتانو د دواړو ګوندونو د غړو له خوا تصویب شوي دي.
په اعلامیه کې راغلي چې په افغانستان کې د امریکا د جګړې په اړه د دغه کمېسیون څېړنې کولای شي راتلونکو امریکايي مشرانو ته د جګړې په اړه درسونه وړاندې کړي.
د یادونې وړ ده چې د افغانستان د جګړې کمېسیون په ۲۰۲۱ میلادي کال کې جوړ او دنده ورکړل شوه چې په افغانستان کې د امریکا دوه لسیزې اوږده جګړه په هر اړخیز ډول وڅېړي.
