۸صبح، کابل: د امریکا د استازو جرګې غړي جېرډ ګولډن د زرګونو افغانانو لپاره د ملاتړ وضعیت د غځولو غوښتنه کړې ده.
هغه دوشنبه د لړم پر ۲۵مه، ویلي چې دغه کسان له امریکا سره د همکارۍ له امله په افغانستان کې د طالبانو له ګواښ سره مخ دي.
ګولډن زیاته کړې چې په افغانستان کې د خپل ماموریت پر مهال له لسګونو هغو افغانانو سره اشنا شوی و، چې د امریکايي ځواکونو د ساتنې لپاره یې خپل ژوند له خطر سره مخ کړی و.
د امریکا د کانګرېس دغه غړي ویلي چې امریکا په د دې کار بدل کې له دغو کسانو سره ژمنه کړې وه چې پناه به ورکوي او اوس باید پر خپلې ژمنې عمل وکړي.
ګولډن ټینګار کړی دی: «له همدې امله، ما هم په امريکا کې د دغو افغانانو د ملاتړ وضعیت د مودې د غځولو په اړه د رایې اچونې غوښتنه کړې ده.»
هغه زیاته کړې چې امریکا باید پر خپلې ژمنې عمل وکړي او دغو کسانو ته د خوندي او هوسا ژوند زمینه برابره کړي.






