د امریکا سفارت: په افغانستان کې د لنډمهاله حکومت ملاتړي نه یوو

په دې وروستیو کې په افغانستان کې د موقت حکومت د رامنځته کېدو په اړه ګونګوسې زیاتې شوې او د ډېری سیاسي بحثونو موضوع ده.
په دې لړ کې، په کابل کې د امریکا د سفارت شاژدافیر راس ویلسن وايي چې هېواد یې په افغانستان کې د موقت حکومت له طرحې ملاتړ نه دی کړې او له جوړېدو یې هم ملاتړ نه کوي.
په کابل کې د امریکا د سفارت شاژدافیر د مرغومي په ۲۴مه پر خپل ټويټر لیکلي چې د سولې د مذاکراتو پایلې په افغانانو پورې اړه لري او امریکا باوري ده چې دا پایلې باید د افغانانو هیلې او غوښتنې منعکسې کړي.
راس ویلسن زیاته کړې چې هغه او د افغانستان د سولې په چارو کې د امریکا ځانګړي استازي زلمي خلیلزاد له افغانانو سره د دوحې د سولې مذاکراتو د چټکتیا په اړه خبرې کړې او دغو خبرو ته به دوام ورکړي چې د سولې په هکله د دوی اندېښنې او نظریات واوري.
په کابل کې د امریکا د سفارت د شاژدافیر په وینا، امریکا ژمنه ده چې د سیاسي هوکړې له لارې د افغانستان شخړې پای ته ورسېږي.
د هغه په وینا، دغه سیاسي هوکړه باید تضمین کړي چې افغانستان دیموکراتیک، یو موټی او پیاوړی پاتې کېږی چې د تېرو نولسو کلونو بریاوې خوندي کوي او له ځان او ګاونډیو سره په سوله کې ژوند کوي.
راس ویلسن ویلي چې د افغانستان د سولې مذاکراتو لومړی پړاو مخ په وړاندې ګام ګڼل کېږي خو اړینه ده چې لازیات کار وشي.
د هغه په وینا امریکا د تاوتریخوالي د زرترزره کمښت او اوربند غوښتونکې ده.
د لنډمهاله حکومت په اړه د امریکا دریځ په داسې حال کې مطرح کېږي چې په وروستیو ورځو کې یې د جوړېدو بحثونه زیات شوي. ولسمشر غني هم د موقت حکومت له طرحې سره مخالفت کړی او ویلي یې دي چې د هغه اساسي مسوولیت ټاکل شوي ولسمشر ته د واک لېږدول دي.
د رپوټونو له مخې، زلمي خلیلزاد له یو شمېر سیاسي شخصیتونو سره د حکومت د جوړولو په اړه بحث او خبرې کړې دي.
همداراز کابل ته د خلیلزاد د سفر پرمهال له ولسمشر غني سره د هغه د لیدلو هېڅ رپوټ نه دی خپور شوی. له بلې خوا رپوټ ورکړل شوی چې ولسمشر غني له زلمي خلیلزاد سره له کتنې ډډه کړې ده.