امریکايي ځواکونو انتونیک پوځي اډه ۲۱۵ میوند قول اردو ته وسپارله

د هېواد په سویل کې مېشتو امریکايي ځواکونو د انتونیک پوځي اډه ۲۱۵ میوند قول اردو ته وسپارله.
ددغې اډې د سپارلو مراسم د هلمند ولایت د ۲‍۱۵ میوند قول اردو په قرارګاه کې ترسره شوي وو.
د ۲۱۵ میوند قول اردو مسوولینو ويلي چې انتونیک اډه ددغه نوم په ساتلو سره د ځانګړو افغان ځواکونو د یوه مرکز په توګه کارول کېږي.
د مې میاشتې په لومړۍ نېټه په رسمي توګه له افغانستانه د بهرنیو ځواکونو د وتلو بهیر پيل شو.
د هېواد لوی درستیز او د ملي دفاع وزارت سرپرست محمد یاسین ضیا، د غويي په یوولسمه نېټه په یوه خبري ناسته کې اعلان وکړ چې د بهرنیو ځواکونو د وتلو پر لوژستیکي مسایلو کار روان دی او له بشپړېدو وروسته به د هغوي اډې افغان ځواکونو ته وسپارل شي.
د امریکايي او ناټو ځواکونو د وتلو د مهال وېش له مخې، د بهرنیو ځواکونو د وتلو بهیر پيل شوی دی. د رپوټونو پر بنسټ، دا بهیر پیل شوی او تراوسه یو شمېر امریکايي پوځیان خپل هېواد ته ستانه شوي دي.
امریکا د خپلو ځواکونو د خوندي وتلو په موخه ځینې تابیاوې هم نیولې دي، چې په دې لړ کې یې په سیمه کې د بي ۵۲ ډوله جنګي الوتکو او په افغانستان کې د توغندیو د ځای پر ځای کولو لپاره هڅې پیل کړې او په سلګونه ځانګړي ځواکونه یې افغانستان ته رالېږلي دي.
اخوا، طالبانو ویلي چې د بهرنیو ځواکونو په وتلو کې ځنډ، ددوحې له هوکړې سرغړونه ده او دا ډله یې په غبرګون کې د خپل مشرتابه د پرېکړې په تمه ده. طالبانو همداراز ټینګار کړی چې د بهرنیو ځواکونو په وتلو کې ځنډ، د دوی د هر ډول مناسب اقدام لپاره لاره پرانیستې ده. د دوحې په هوکړه کې له افغانستانه د بهرنیو ځواکونو بشپړ وتل د مې لومړۍ نېټه ټاکل شوې وه.