۸صبح، بلخ: د طالبانو د عامې روغتیا وزارت خبر ورکړی چې ازبکستان په بلخ کې له ابوعلي سینا بلخي روغتون سره د ۲۰۰ زرو ډالرو په ارزښت د روغتیايي او غیرروغتیايي تجهیزاتو مرسته کړې ده.
نوموړي وزارت شنبه د زمري پر ۱۰مه په خپرې کړې خبرپاڼې کې ویلي چې په مرسته شویو توکو کې د ناروغانو بسترونه، ویلچرې، یخچالونه او نور د اړتیا وړ تجهیزات دي.
د خبرپاڼې له مخې، دا تجهیزات د روغتیايي امکاناتو د پیاوړتیا او د ابوعلي سینا بلخي روغتون د روغتیايي خدماتو د ښه والي په موخه برابر شوي دي.
دا په داسې حال کې ده چې د راپورونو له مخې، په وروستیو کالو کې د افغانستان روغتیايي نظام د تجهیزاتو، بودیجې او نړیوالو مرستو د کمښت له کبله له ننګونو سره مخ شوی دی.
