ددغه ولایت د ښځو چارو اداره د ښځو په وړاندې د تاوتریخوالي د زیاتوالي لامل د قرنطين پر مهال په کورونو کې د نارینه وو پاتې کېدل او د ناامنۍ دوام بولي.
فاطمه چې خاوند یې څو کاله مخکې د کندهار په ارغستان ولسوالۍ کې د بمي چاودنې له امله وژل شوی اوس د خپلو ماشومانو روزنه او پالنه پرغاړه لري.
فاطمه وایي چې د ګڼو ستونزو له زغملو وروسته یې د کندهار د مېرمنو د مسلکي زده کړو په مرکز کې د خیاطي زده کړې ته مخه کړې ترڅو له دې لارې د کورنۍ ورځنۍ اړتیاوې برابرې کړي.
دغه مېرمن زیاتوي چې د زده کړو پرمهال هم یوه اندازه پیسې ورکول کېږي او کله چې کار زده کړي کولای شي چې لازیاتې پیسې ترلاسه کړي.
په کندهار کې د روانو جګړو او ناخوالو له امله ښايي د فاطمې په شان زیات شمېر نورې میرمنې هم له دا ډول ستونزو سره مخامخ وي.
اخوا، د کندهار د ښځو چارو رئیسه روقيه اڅګزۍ وایي، د تېر کال په پرتله په کندهار کې د مېرمنو پر وړاندي د تاوتريخوالي کچه لوړه شوې چې په یوه کال کې د ښځو په وړاندې ۲۴۱ پېښې ثبت شوې دي.
مېرمن اڅګرۍ زیاتوي چې لاهم په کندهار ولایت کې مېرمنې د جګړو ترڅنګ له طلاق، د مېراث د نه ورکړې، وهلو ټکولو او په کم عمر او جبري ودولو په شان ستونزو سره مخ دي.
د کندهار د ښځو چارو اداره وایي چې د پخوا په پرتله د مېرمنو د حقونو په اړه د پوهاوي په برخه کې د نړيوالې ټولنې مرستې هم کمې شوې او همداراز، د جګړو له امله دوی نشي کولای د کندهار لیرې پرتو سيمو ته د عامه پوهاوي په موخه سفر وکړي.