د امریکا ولسمشر ډونالډ ټرمپ او د اسراییلو لومړي وزیر بنیامین نتانیاهو پر ایران د پوځي بریدونو د بیا پیلولو د احتمال په اړه خبرې کړې دي.
والسټریټ ژورنال شنبه د اکټوبر پر ۳۱مه، د باخبره سرچینو په حواله راپور ورکړی چې دا ټیلیفوني خبرې د جمعې پر سهار شوې دي.
د راپور له مخې، دا خبرې په داسې حال کې شوې دي چې امریکا پر ایران د پوځي بریدونو د بیا پیلولو لپاره پلانونه جوړوي.
په همدې حال کې، د امریکا د بهرنیو چارو وزیر مارکو روبیو ویلي چې ټرمپ له ایران سره د شخړې د هواري لپاره ډیپلوماټیکه لاره غوره ګڼي؛ خو واشنګټن د دې وړتیا هم لري چې خپلې موخې له پوځي لارې ترلاسه کړي.
دا په داسې حال کې ده چې د ایران د وسله والو ځواکونو لوی درستیز امریکا او اسراییلو ته خبرداری ورکړی چې پر ایران هر ډول برید به له پراخ او «نه تصور کېدونکي» ځواب سره مخ شي.
