۸صبح، کابل: د خوړو نړیوال پروګرام خبرداری ورکړی چې د افغانستان په ختیځو، سویلي او لوېدیځو پولو کې د تاوتریخوالي زیاتوالي بشري ناورین لا پسې زیات کړی دی.
دغه پروګرام چهارشنبه د کب پر ۱۳مه په یوه پیغام کې زیاته کړې چې افغانستان په نړۍ کې د خوړو له تر ټولو سخت ناورین سره مخ دی.
په افغانستان کې د خوړو نړیوال پروګرام استازي جان ایلف ټینګار کړی چې نښتې په هغو سیمو کې شوي دي چې اوسیدونکي یې لا له وړاندې په یوه کړکېچن حالت کې ژوند کوي.
هغه زیاته کړې چې د پاکستان له هوایي بریدونو وروسته، په ختیځو او سویلي پولو کې شاوخوا ۲۰زره کسان بې ځایه شوي دي.
هغه ویلي چې په افغانستان کې له ۱۷ میلیونو ډېر خلک خوراکي مرستې ته اړتیا لري.
له دې سره هممهاله، په افغانستان کې د ملګرو ملتونو د مرستندوی پلاوي دفتر (یوناما) ویلي چې د لومړنیو شمېرو له مخې، د پاکستان په هوایي بریدونو کې ۴۲ ملکي وګړي وژل شوي او شاوخوا ۱۰۰ نور ټپیان شوي دي.
