۸صبح، کابل: د روغتیا نړیوال سازمان (WHO) ویلي چې په افغانستان کې څه د پاسه ۲۲ میلیونه کسان بشري مرستو ته اړتیا لري او د بودیجې کمښت، روغتیايي خدماتو ته د میلیونونو وګړو لاسرسی له جدي ګواښ سره مخ کړی دی.
نوموړي سازمان جمعه د چنګاښ پر ۱۹مه راپور ورکړی چې د اړمنو له ډلې، ۱۴.۴ میلیونه یې روغتیايي خدماتو ته اړتیا لري.
د راپور له مخې، د ۲۰۲۶ کال له پیله تر اوسه شاوخوا ۱۵۰ روغتیايي مرکزونو د بشردوستانه بنسټونو په ملاتړ فعالیت کړی، د بودیجې د کمښت له کبله یې خپل فعالیتونه درولي یا ځنډولي دي.
د روغتیا نړیوال سازمان ویلي چې د ۲۰۲۶ کال لپاره د «روغتیا کلسټر» د ځوابویلو پروګرام له سخت مالي کمښت سره مخ دی او د جون میاشتې تر پایه یوازې د اړتیا وړ بودیجې ۱۷ سلنه تمویل شوې ده.
نوموړي بنسټ ټینګار کړی چې د افغانستان د روغتیايي لومړیتوبونو لکه لومړني روغتیايي خدمات، د پولیو له منځه وړل، واکسیناسیون، د ناروغیو څارنه او نورو بنسټیزو روغتیايي خدماتو د ملاتړ هڅو ته به دوام ورکړي.
د روغتیا نړیوال سازمان زیاته کړې چې د روغتیايي برخې د لاستهراوړنو د خوندیتوب او میلیونونو افغانانو ته د ژوند ژغورونکو روغتیايي خدماتو د لاسرسي ډاډمنولو لپاره، د نړیوالې ټولنې د ملاتړ دوام اړین دی.
