۸صبح، کابل: د روغتیا نړیوال سازمان (WHO) اعلان کړی چې د کونړ او ننګرهار د زلزله ځپلو لپاره ۳۵ ټنه حیاتي روغتیايي تجهیزات افغانستان ته رسېدلې دي.
نوموړي سازمان دوشنبه د وږي پر ۱۷مه راپور ورکړی چې د مرستې دا جوپه د بېړني روغتیايي وضعیت لپاره په دوبۍ کې د روغتیا نړیوال سازمان د لوژیستکي مرکز له خوا چمتو شوې او د دوبۍ د بشردوستانه بنسټ په همکارۍ افغانستان ته لېږدول شوې ده.
د راپور له مخې، په دې جوپه کې بنسټیز روغتیايي توکي لکه پر شدیدې خوارځواکۍ د اخته ماشومانو لپاره ځانګړې کڅوړې، د غیرساري ناروغیو کڅوړې، د جراحۍ کڅوړې، درمل او نور اړین طبي تجهیزات دي.
په افغانستان کې د روغتیا نړیوال سازمان د استازي مرستیالې مکتا شرما ویلي: «دا مرسته د زلزله ځپلو اړتیاوو ته د پاملرنې په موخه مهم ګام دی.»
دا مرسته داسې مهال کېږي چې ملګرو ملتونو ویلي چې د کونړ او ننګرهار د زلزلو په قربانیانو کې څه باندې ۵۰ سلنه یې مېرمنې او نجونې دی.
ورته مهال د ملګرو ملتونو له ماشومانو د ملاتړ صندوق (یونیسف) اعلان کړی چې په کونړ کې د وروستۍ زلزلې له کبله ۷۳۱ ماشومان مړه شوي دي.
دا په داسې حال کې ده چې د افغانستان په ختیځ کې له وروستیو مرګونو زلزلو اغېزمن شوي وايي چې نه شي کولی خپلو ویجاړو شویو کورونو ته ستانه شي.
