۸صبح، کابل: د روغتیا نړیوال سازمان (WHO) په افغانستان کې د هوا د تودوخې د لوړېدو له امله له خلکو غوښتي، چې د سختې ګرمۍ پر وړاندې د ځان او خپلو کورنیو د خوندي ساتلو لپاره اړین احتیاطي تدابیر ونیسي.
دغه سازمان شنبه د چنګاښ پر ۲۷مه پر خپلې اېکسپاڼه لیکلي، چې په منظم ډول د اوبو څښل، د نریو او ازادو جامو اغوستل، د پلنې یا سیوري لرونکې خولۍ کارول، په یخو اوبو لمبېدل او د ورځې په اوږدو کې د سپکو خوړو خوړل، د بدن د تودوخې په کنټرول کې مرسته کوي.
د روغتیا نړیوال سازمان له خلکو غوښتي، چې د ګرمۍ د زیانونو د کمولو لپاره په سیورو کې پاتې شي او هره ورځ له دوو تر درېیو ساعتونو پورې په سړو ځایونو کې وخت تېر کړي.
دغهسازمان خبرداری ورکړی، چې د سختې ګرمۍ پر مهال باید له درنو بدني فعالیتونو او په پارک شویو موټرو کې د ماشومانو له پرېښودو ډډه وشي.
بلخوا، د طالبانو د طبیعي پېښو پر وړاندې د مبارزې د چمتووالي ملي ادارې هم ویلي، چې د روانې اوونۍ د چهارشنبې په ورځ د هېواد په شمالي او لوېدیځو سیمو کې د تودوخې درجه ښايي د سانتي ګراد په کچه له ۴۵ درجوړ لوړه شي.
