قره قُل د هغه وري نوم دی، چې ښکلی پوستکی لري. په افغانستان کې دا ډول پسونه تر ډېره د هېواد په شمال کې موجود دي. د قره قُل وری چې کله نوی وزېږي، حلالېږي او له پوستکي یې خولۍ، پوستین، پوستینچه او کوټ جوړېږي. دا پوستکي ښکلې بڼه لري او بیه یې هم په ښکلا، طرحې او رنګ پورې اړه لري. د دغو پوستکو اصلي سوداګر د فنلنډ او چین دي. د افغاني قره قُل له پوستکو، د موډ لوي شرکتونه د جامو په برابرولو کې ګټه اخلي. د قره قُل پوستکي صنعت تر ډېره د افغانستان د شمالي ولایتونو فاریاب، جوزجان، بلخ او سمنګان ولایتونو په ترکمن او ازبک قومونو کې دود دی. دا پوستکي له پستې وروسته، د افغانستان د صادراتو تر ټولو لويه سرچینه ده. په تېرو وختونو کې سوداګرو د قره قُل له صادراتو ښه عواید ترلاسه کول؛ خو اوس په هېواد کې د قره قُل صنعت له ځوړتیا سره مخ شوی دی.
په کندوز کې د قره قُل یو سوداګر نصرت الله ترکمن وایي، چې د امنیتي ستونزو او د مخیکني نظام د سقوط له امله، د دغو پوستکو سوداګر له هېواده وتلي او اوس څوک نشته چې د قره قُل پوستکي صادرات ترسره کړي. ترکمن زیاته کړه، چې هغه د تېرو کلونو په پرتله ډېر زیان کړی، ځکه نړیوالې الوتنې محدودې شوې او څوک قره قل پوستکي نه پېري.
په کندوز کې د قره قُل یوه بل سوداګر سیدجواد ۸صبح ورځپاڼې ته وویل، څه دپاسه شل کاله کېږي چې د پوستکو تجارت کوي. د هغه په وینا، په تېرو وختونو کې د قره قُل پوستکو ښه بازار درلود او په بهرنیو بازارونو کې یې هم ډېر مشتریان لرل. نوموړی وايي، چې د تېر کال په پرتله د قره قُل صادرات کم شوي او د بازار د تقاضا نشتوالي له امله یې سوداګري له سقوط سره مخ کړې ده. د قره قُل دغه سوداګر وویل، چې څاروي لروونکي خپل وري نه حلالوي، ځکه بازار نه لري. د هغه په وینا، پخوا به د کندوز په بازار کې د یوه کبوچه یو پوستکی په کابو پنځه زره افغانۍ پلورل کېده؛ خو اوس د وچکالۍ، ناامنۍ او ښه اقتصاد د نشتوالي له امله په یو زر او ۵۰۰ افغانۍ هم نه پلورل کېږي.
د کندوز یو شمېر څاروي لرونکي وايي، چې د دغه ولایت او نورو ولایتونو په بازارونو کې د قره قُل پوستکو بیه ټیټه شوې او له همدې امله وري نه حلالوي. محمدهاشم چې په شېرخان بندر کې د قره قُل پوستکي د خولیو او پوستین کاروبار لري وايي، د ننه په هېواد کې هم د قره قل پوستکي کاروونکي کم شوي او دغه صنعت خپل مینه وال له لاسه ورکړي دي. د نوموړي په وینا، په تېرو کلونو کې پلور زیات و او ډېرو خلکو به قره قُل خولۍ او پوستینونه اخیستل یا به یې په بهر کې خپلو دوستانو ته لېږل؛ خو اوس په ورځو ورځو څوک ان د بیې پوښتنه يې هم نه کوي.
د قره قُل پوستکو سوداګر او صنعتکاران له طالبانو غواړي، د قره قُل د سوداګرۍ او صادراتو زمینه برابره کړي او پرېنږدي چې دا لرغونی دود له منځه لاړ شي.
په نړیوالو بازارونو کې د وري درې ډوله پوستکي پېرودونکي لري؛ کبوچه، سور او د خړو وریو پوستکي. د افغانستان د قره قُل پوستکي کیفیت په نړۍ کې کمساری دی او د دغو پوستکو ډېری پېرودونکي په بریتانیا، ډنمارک، فنلنډ او چین کې دي.
