۸صبح، کابل: د مارچ اتمې د ښځو د پیوستون نړۍوالې ورځې د نږدې کېدو په درشل کې، په هېواد کې یو شمېر ښځینه ورزشکارانې وايي چې د طالبانو بیاځل واکمنېدو سره دوی په ډېر بې رحمه ډول ځپل شوي دي.
دوی دوشنبه، د کب پر ۱۴مه په یوې خبرپاڼه کې ویلي چې طالبان د ښځو سپورټ د «غرب پالنې» سمبول ګڼي او په هېواد کې یې د ښځو ورزشي ځایونه تړلي دي.
د ښځو ارغواني غورځنګ د ورزشي کمېټې په اعلامیه کې راغلي چې طالبانو واک ته له رسېدو وروسته یو شمېر ښځینه ورزشکارانې نیولي او له څه مودې بند وروسته یې د لیکلې ژمنې او ستر مالي ضمانت په بدل کې ازادې کړې دي.
دوی نارینه ورزشکارانو ته په خطاب کې ویلي چې « غوړهمالي مه کوئ او ورزشي اخلاق تر پښو لاندې مه غورځوئ. هیله کوو چې له دې زیات د وجدان، ناموس او ورزشي اخلاقو تر پښو لاندې کولو سره د طالبانو تورې څېرې مه سپینوئ.»
د معترضو مېرمنو د څرګندونو پر بنسټ، د طالبانو له واکمنۍ وروسته ډېری ښځينه ورزشکارانې د پاکستان او ایران هېوادونو ته تښتېدلي او اوس په یوه بېبرخلیکه وضعیت کې ژوند کوي.
دوی له نړۍوالو سازمانونو او هغو هېوادونو څخه چې کډوال مني غوښتنه کړې چې د بشري ویزو په ورکولو سره دې د افغان ښځینه ورزشکارانو ملاتړ وکړي.
د ویلو ده چې د طالبانو له بياځلې واکمنۍ وروسته، د دوحې په مذاکراتو کې د دغې ډلې مشرانو د ژمنو خلاف، ۹۰مې لسيزې ته ورته د نجونو او ښځو پر وړاندې سخت قوانين وضع کړي دي.
له څه باندې دوه نیمو کلونو راهیسې طالبانو د هېواد نجونې او ښځې د سیاست، سپورټ او زدهکړو له ډګره ایستلي دي.
