۸صبح، کابل: اطلاعاتو ته د لاسرسي له نړیوالې ورځې سره هممهاله، د طالبانو تر واک لاندې افغانستان کې خبریالان او رسنۍ اطلاعاتو ته د لاسرسي او د رسنیزو فعالیتونو په برخه کې له زیاتېدونکو محدودیتونو شکایت کوي.
یو شمېر خبریالانو دوشنبه د تلې پر ۶مه، له ۸صبح ورځپاڼې سره په خبرو کې وويل چې د نیول کېدو، ګواښونو او امنیتي پایلو له وېرې نه شي کولای یو شمېر پېښې او موضوعات په ازاده توګه خپاره کړي.
د دوی په وینا، پر رسنیو لګېدلو محدودیتونو اطلاعاتو ته د خبریالانو لاسرسي او د خپلواکې راپور ورکونې بهیر ستونزمن کړی دی.
د خبریالانو نیول، سانسور، خپرنیز محدودیتونه، د ژوندیو موجوداتو د انځورونو پر خپرولو بندیز، د سیاسي ژوندیو خپرونو مخنیوی، د رسنیو د فعالیتونو ځنډول او اطلاعاتو ته د لاسرسي محدودیتونه په هېواد کې د خپلواکو اطلاعاتو د خپرولو بهیر له ننګونو سره مخ کړی دی.
دغو محدودیتونو د خبریالانو او رسنیو قانوني حقونه تر پښو لاندې کړي او روڼتیا او حسابورکونه یې کمه کړې ده.
بلخوا، یو شمېر ښځینه خبریالانې هم وايي چې په ځینو غونډو او پروګرامونو کې د ګډون اجازه نه ورکول کېږي. دوی وايي چې دغو محدودیتونو په رسنیو کې د ښځو پر کاري فرصتونو هم اغېز کړی او ځینو رسنیو د ښځینه خبریالانو ګومارنه کمه یا درولې ده.
بلخوا، په تبعید کې افغان خبریالان هم لومړنیو معلوماتو ته د لاسرسي له ستونزو شکایت کوي.
دوی وايي چې له سرچینو سره په اړیکه کې محدودیتونو د باوري اطلاعاتو او مستقیمو سرچینو ته د دوی لاسرسی ستونزمن کړی دی.
تر دې وړاندې یوناما په یوه راپور کې ویلي وو چې طالبانو د خبریالانو په نیولو، د رسنیو د فعالیتونو په ځنډولو او پر خپرونو د محدودیتونو په لګولو سره د رسنیو د ازادۍ محدودولو ته دوام ورکړی دی.
دغه محدودیتونه په داسې حال کې مطرح کېږي چې اطلاعاتو ته ازاد او برابر لاسرسی د وګړو له بنسټیزو حقونو او د باخبره پرېکړو او ټولګډونه ټولنې د رامنځته کېدو له بنسټونو ګڼل کېږي.
