۸صبح، کابل: ملګرو ملتونو د بشري استوګنې د نړیوالې ورځې په مناسبت ویلي چې د افغان راستنېدونکو د شمېر په زیاتېدو سره په افغانستان کې مناسبو کورونو او سرپناه ته اړتیا زیاته شوې ده.
دغه سازمان دوشنبه د تلې پر ۱۳مه، اعلان کړی چې د ۲۰۲۳ کال له وروستیو راهیسې له شپږ میلیونو ډېر افغانان هېواد ته راستانه شوي او تمه ده چې په ۲۰۲۶ کال کې هم د افغان کډوالو د راستنېدو بهیر دوام وکړي.
ملګرو ملتونو ویلي چې د راستنېدونکو د اړتیاوو د پوره کولو لپاره اوسنی ملاتړ بسنه نه کوي او هغوی مناسبو کورونو او سرپناه ته اړتیا لري.
دغه سازمان د سږ کال د بشري استوګنې نړیوالې ورځې شعار «د ټولو لپاره مناسب کور» بللی دی.
د اکټوبر پنځمه هر کال د بشري استوګنې د نړیوالې ورځې په توګه نمانځل کېږي؛ دا هغه مناسبت دی چې ملګرو ملتونو د نړۍ په کچه د استوګنې وضعیت، ښاري پراختیا او د خلکو د ژوند شرایطو ته د لا ډېرې پاملرنې اړولو لپاره ټاکلی دی.
د بشري استوګنې نړیواله ورځ په ۱۹۸۵ کال کې د ملګرو ملتونو د عمومي اسامبلې له خوا رامنځته شوه او لومړی ځل په ۱۹۸۶ کال کې ونمانځل شوه.
