۸صبح، کابل: د روغتیا نړیوال سازمان (WHO) ویلي چې په افغانستان کې د حادو تنفسي ناروغیو له امله د مړینې ۱۷۰ پېښې ثبت شوې دي.
دغه بنست یکشنبه د تلې پر ۵مه راپور ورکړی چې په افغانستان کې د حادو تنفسي ناروغیو ټولټال ۶۴ زرو ۵۰۶ پېښو خبر ورکړل شوی دی.
د راپور پر بنسټ، د تنفسي ناروغیو ثبت شوې پېښې د جولای میاشتې پرتله ۱۷،۴ سلنه کمې شوې دي.
همداراز یاد بنسټ د شري ناروغۍ یو زرو ۴۲۳ شکمنې پېښې او له دغې ناروغۍ سره تړلې د مړینې د اوو پېښو خبر ورکړی دی.
دا شمېرې هم د جولای میاشتې پرتله ۴۴،۵ سلنه کموالی ښيي؛ ځکه په یاده میاشت کې د شري دوه زره او ۵۶۲ شکمنې پېښې او نهه د مړینې پېښې راپور شوې وې.
دا په داسې حال کې ده چې افغانستان د روغتیا په برخه کې له پراخو ننګونو سره مخ دی او تنفسي ناروغۍ لا هم په هېواد کې له مهمو روغتیايي ستونزو څخه شمېرل کېږي.
