۸صبح، کابل: د روغتیا نړیوال سازمان ویلي چې د نورستان په مرکز پارون کې وروستیو سېلابونو بنسټیزو خدماتو ته د ځپل شویو لاسرسی محدود کړی دی.
نوموړي بنسټ پنجشنبه د زمري پر لومړۍ راپور ورکړی چې په ځپل شویو سیمو کې روغتیايي خدماتو ته محدود لاسرسی او د روغتیايي تجهیزاتو او درملو کمښت لویې ستونزې دي.
د دغه سازمان په خبره، د یوه روغتیايي مرکز ویجاړېدل، د برېښنا پرې کېدل او ځپل شویو سیمو ته سخت لاسرسي هم د مرستو رسولو او روغتیايي خدماتو د وړاندې کولو بهیر له ننګونو سره مخ کړی دی.
د روغتیا نړیوال سازمان ویلي چې دا مهال سېلابځپلي روغتیايي خدماتو، د څښلو پاکو اوبو او سرپناه ته بېړنۍ اړتیا لري.
دا په داسې حال کې ده چې په نورستان کې خونړیو سېلابونو د ځاني زیان ترڅنګ پراخ مالي زیانونه هم اړولي دي.
د وروستیو شمېرو له مخې، په دې پېښه کې ۲۴ کسان مړه او ۸۵ نور ټپيان شوي دي.
