۸صبح، کابل: د روغتیا نړیوال سازمان د ډینګي تبې د مخنیوي لپاره د ولاړو اوبو پر له منځه وړلو او د کورونو شاوخوا د چاپېریال پر پاک ساتلو ټینګار کړی دی.
دغه سازمان شنبه د لړم پر ۱۶مه، ویلي چې د ډینګي تبې لېږدوونکي ماشې د اوبو په ډکو لوښو کې، که هغه د کور دننه وي او که له کوره بهر، هګۍ اچوي او ډېرېږي.
د روغتیا نړیوال سازمان له خلکو غوښتي چې د اوبو زېرمې پټې وساتي، د اوبو لوښي هره اوونۍ تش او پاک کړي او د ګلدانونو اوبه په منظم ډول بدلې کړي.
دغه راز، دغه سازمان سپارښتنه کړې چې هغه توکي لکه پلاستیکي بوتلونه، زاړه ټایرونه او ډبي چې اوبه پکې راټولېږي، لېرې وغورځوي او ویالې او د اوبو لښتي پاک وساتي.
د دغه سازمان په وینا، ان د بوتل سرپوښ هم دومره اوبه زېرمه کولای شي چې ماشې پکې ډېرې شي.
دا په داسې حال کې ده چې د روغتیا نړیوال سازمان د پنجشنبې په ورځ د افغانستان په ختیځ کې د ډینګي تبې د پېښو د زیاتوالي خبر ورکړی و.
