۸صبح، کابل: په افغانستان کې د ملګرو ملتونو د مرستندوی پلاوي دفتر (یوناما) ویلي، اټکل کېږي چې د روان میلادي کال په لړ کې د افغانستان نفوس ۴۸.۶ میلیونو ته ورسېږي.
یوناما شنبه د جولای پر ۲۰مه، پر خپله فېسبوکپاڼه لیکلي چې د وګړو کره معلومات او احصایې د باخبره پرېکړو، اغېزناکو پالیسیو او پروګرامونو د جوړولو زمینه برابروي.
ملګرو ملتونو ویلي، په دې نفوس کې میلیونونه ښځې، نجونې او ځوانان شامل دي چې روغتیا، حقونه او فرصتونه یې د افغانستان راتلونکی جوړوي.
دغه سازمان ټینګار کړی چې لا هم په یو شمېر ولایتونو کې د تنکیو نجونو د زېږونونو د لوړې کچې او له ۱۸ کلنۍ مخکې د نجونو د ودونو په ګډون مهمې ننګونې پر خپل ځای پاتې دي.
یوناما زیاته کړې، د نړۍ د نفوس له زیاتېدو سره هممهاله د نفوس د بدلونونو، اقلیمي بدلون او دوامدارې پراختیا ترمنځ اړیکه تر بل هر وخت ډېره مهمه شوې ده.
د دې سازمان په وینا، پر خلکو، په ځانګړي ډول پر ښځو او ځوانانو، د زدهکړو، روغتیايي خدمتونو او اقتصادي فرصتونو له لارې پانګونه د پايښت لرونکو ټولنو په جوړولو او د یوه دوامدار راتلونکي په رامنځته کولو کې بنسټیز رول لري.
د یوناما په وینا، که څه هم د نړۍ د شين کوريزو ګازو په خپرېدو کې د افغانستان ونډه له لسمې برخې هم کمه ده، خو دغه هېواد لا هم د اقلیمي بدلونونو پر وړاندې د نړۍ له تر ټولو زیانمنونکو هېوادونو ګڼل کېږي.
د ملګرو ملتونو مرستندوی پلاوي ټینګار کړی چې وچکالي، سېلابونه، د هوا تودېدل او د اوبو کمښت لا هم د خلکو د ژوندانه او معیشت لپاره جدي ګواښونه دي.
