۸صبح، کابل: په کابل، ایران او پاکستان کې مېشتو یو شمېر افغان معترضو مېرمنو د یلدا شپه نمانځلې او دا یې د طالبانو د بندیزونو پر وړاندې اعتراض بللی دی.
د ښځو د یووالي او پیوستون غورځنګ په یو بیان کې ویلي چې دوی دا شپه جمعه د لیندۍ پر ۳۰مه، په کابل، ایران او پاکستان کې لمانځلې ده.
د دغه غورځنګ په وینا، پر افغانستان د طالبانو له واکمنېدو وروسته دغې ډلې د افغانانو کلتور او ژبه په نښه کړي او د هر ډول لرغوني جشن پر نمانځلو یې بندیز لګولی دی.
د دغه غورځنګ په بیان کې راغلي دي: «د نورو کلونو په څېر سږکال هم موږ ښځو د يلدا شپه ولمانځله او په دې شپه مو د جهالت او تيارو د ختمولو او د ازادۍ رڼا هيله وکړه.»
د يادونې ده چې په هېواد کې دننه او بهر د ښځو بېلابېلو غورځنګونو د يلدا شپه نمانځلې او پر افغانستان يې د طالبانو د واکمنۍ د پای ته رسېدو غوښتنه کړې ده.
