۸صبح، کابل: طالبانو ویلي چې پرون ۲۴۴ کورنۍ چې ۱۱۸۳ کسان پکې شامل دي، له بېلابېلو لارو په جبري توګه افغانستان ته راستنې کړل شوې دي.
د طالبانو د ویاند مرستیال حمدالله فطرت دوشنبه د وږي پر ۱۶مه، په یوه خبرپاڼه کې ویلي چې ۱۳۲ کورنۍ چې ۶۹۴ کسان پکې شامل دي، د تورخم له لارې افغانستان ته راغلې دي.
د خبرپاڼې له مخې، ۱۲ کورنۍ د سپینبولدک له لارې او ۸۹ کورنۍ د نیمروز له لارې افغانستان ته راستنې شوې دي.
همداراز په خبرپاڼه کې راغلي چې ۱۱ کورنۍ د اسلامکلا له لارې هېواد ته راغلې دي.
دا په داسې حال کې ده چې له ګاونډیو هېوادونو د افغان کډوالو د جبري ستنولو لړۍ لا هم روانه ده او ګڼې هغه کورنۍ چې افغانستان ته را ستنې کړل شوې، له سختو اقتصادي او ټولنیزو شرایطو سره مخ دي.
