زلمی خلیلزاد: د طالبانو له خوا د کابل د سقوط په اړه اندېښنې ناسمې دي

د افغانستان د سولې په چارو کې د امریکا ځانګړي استازي زلمي خلیلزاد ددغه هېواد په کانګرس کې د وینا پرمهال ویلي، د طالبانو له خوا د کابل د سقوط په اړه اندېښنې ناسمې دي.
د رپوټونو پربنسټ، خلیلزاد ویلي چې له افغانستانه د نړیوالو ځواکونو له وتلو وروسته د طالب جنګیالیو د چټک پرمختګ او د دوی له خوا د کابل د سقوط په هکله اټکلونه بدبینانه دي. نوموړي د غويي په ۲۸مه نېټه د امریکا په کانګرس کې دا څرګندونې کړې دي. ددغه رپوټ له مخې، خلیلزاد جوته کړې: «زه فکر کوم، دا څرګندونې چې افغان امنیتي ځواکونه تجزیه کېږي او د چارو واګې په چټکه توګه د طالبانو لاس ته ورشي ناسمې دي.»
اخوا، د امریکا د کانګرس د بهرنیو اړیکو د کمیټې غړو اندېښنه څرګنده کړې چې د امریکايي ځواکونو د بشپړ وتلو په هکله د امریکا د ولسمشر جوبایډن پرېکړه ښايي د کورنۍ جګړې لامل شي. له بلې خوا، خلیلزاد ویلي چې طالبان د مذاکرې له لارې د حل لارې د لټولو لپاره دلایل لري نه د پوځي بري لپاره، چې په دې کار سره له نړیوال مشروعیته برخمن شي او نومونه یې د امریکا او ملګروملتونو سازمان له لېستونو وایستل شي.
خلیلزاد همداراز ویلي چې طالبانو ډله د اړیکو د عادي کولو، منل کېدو، له لېست څخه د نومونو د وتلو، د بندیزونو د لیرې کولو او له انزوا د خلاصون په لټه کې ده.
د افغانستان د سولې په چارو کې د امریکا ځانګړی استازی وايي چې له افغانستانه د ځواکونو د وتلو بهیر په ښه توګه پر مخ ځي. له افغانستانه د امریکايي ځواکونو د وتلو بهیر د روان کال د مې په لومړۍ نېټه پیل شو. د اعلان له مخې دا ځواکونه به د سپتمبر تر یوولسمې نېټې له افغانستانه ووځي. د امریکا مرکزي قوماندانۍ رپوټ ورکړی چې له ۱۳ تر ۲۰ سلنې ځواکونه له افغانستانه وتلي دي.