۸صبح، کابل: د روسیې د ولسمشر ځانګړي استازي ضمیر کابلوف ویلي چې مسکو چمتو دی له سیمهیېزو شریکانو سره په ګډه د طالبانو او پاکستان د نږدې کولو او د دواړو لورو ترمنځ د اختلافاتو د حل لپاره هڅې وکړي.
ټاس خبري اژانس چهارشنبه د تلې پر ۱۵مه راپور ورکړی چې کابلوف ویلي، لوېدیځ هېوادونه به د طالبانو او پاکستان ترمنځ د ترینګلتیا د حل په بهیر کې ونډه ونه لري.
هغه زیاته کړې چې روسیه چمتو ده د طالبانو او اسلاماباد ترمنځ د پخلاینې په برخه کې همکاري وکړي، که څه هم د افغانستان په اړه د «مسکو فارمټ» په غونډه کې د دواړو غاړو ترمنځ اختلافات حل نه شول.
کابلوف داسې مهال د ددغو اختلافاتو د حل لپاره د مسکو پر چمتووالي ټینګار کړی چې د طالبانو او پاکستان ترمنځ ترینګلتیا لا روانه ده.
د روسیې د علومو اکاډمۍ د ختیځپېژندنې انسټیټیوټ لوړپوړې څېړونکې ناتالیا زامارایوا هم ویلي چې د طالبانو او پاکستان ترمنځ اختلافات پړاویز دي او دا وضعیت د حکومتونو بدلون نه شي بدلولی.
هغې زیاته کړې چې روسیه په دې برخه کې د منځګړي په توګه ونډه اخیستلی شی، ځکه مسکو د سیمې له ثبات سره لېوالتیا لري.
