د پاکستان لوړپوړی پلاوی کابل ته راغلی دی
محمد عزيز پردېس
د افغانستان لپاره د پاکستان ځانګړي استازي محمد صادق په مشرۍ يو لوړپوړی پاکستانی پلاوی کابل ته راغلی دی. د معلوماتو پر بنسټ تمه ده دغه پلاوی د افغان چارواکو سره د سولې پروسې او نورو موضوعاتو په اړه مهمې ناستې ولري.
په کابل کې د پاکستان سفير منصور احمد خان په خپل ټوېټر د دغه پلاوي راتګ منلی دی او ويلي يې دي چې ياد پلاوی به افغان چارواکو سره د سولې، امنيت او اړوندو موضوعاتو باندې خبرې اترې ولري.
دا په داسې حال کې ده چې تېره ورځ د افغانستان د ملي امنيت شورا سلاکار له رسنيو سره په خبرو کې هم ويلي ؤ چې تمه ده یو پاکستانی پلاوی کابل ته راشي او د دوه اړخيزو اړيکو پر پياوړتيا او يو شمېر ستونزو د حل په موخه به پر تخنيکي مسايلو خبرې اترې وشي.
نوموړي همداراز وويل چې، پاکستان سره بايد ستونزه حل شي، لاسپوڅي يې ښايي هر ډول ادعا ولري خو واقعيت له سترګو پټ نه دی.
د يادونې وړ ده چې تمه وه څو ورځې وړاندې د پاکستان د پارلمان يو لوړپوړی پلاوی د افغانستان پارلمان په رسمي بلنه کابل ته راشي، خو دغه سفر د حامد کرزي نړيوال هوايي ډګر د تړل کېدو له امله وځنډول شو.
د افغان سولې اړوند د موضوعاتو په تود بازار کې کابل ته د پاکستان په شمول د مختلفو هېوادونو د لوړپوړو چارواکو سفرونه په دې وروستيو کې ډېر شوي دي.
د همدې سفرونو په لړ کې په نږدې ورځو کې د امريکا د دفاع او بهرنيو چارو وزيرانو د ناڅاپي سفرنو په دوام د امريکا د استخباراتي ادارې يا سي ای اې مشر هم په يو نا اعلان شوي او پټ سفر کابل ته راغلی ؤ او کابل کې يې د لوړ پوړو افغان چارواکو سره پر يو لړ مهمو موضوعاتو بحثونه لرل.
