۸صبح، کابل: د طالبانو د ریاست الوزرا اداري مرستیال عبدالسلام حنفي په کابل کې د چین له سفیر سره په «تودیعي» ناسته کې پر دوه اړخیزو اړیکو او د اقتصادي همکاریو پر پراختیا خبرې کړې دي.
د طالبانو مرستیال ویاند حمدالله فطرت سهشنبه د تلې پر ۷مه خبر ورکړی چې د چین سفیر په افغانستان کې د خپل درې کلن ماموریت پر مهال له همکارۍ او ملاتړه مننه کړې او د دواړو خواوو ترمنځ اړیکې یې تاریخي بللې دي.
ژاو شینګ ویلي چې چین په ملګرو ملتونو او نورو نړیوالو بنسټونو کې له طالبانو ملاتړ کوي او ویلې یې دي چې په تېرو درېیو کالو کې د دواړو خواوو ترمنځ اقتصادي اړیکې او تګراتګ پراخ شوی دی.
عبدالسلام حنفي په افغانستان کې د چین سفیر له ماموریت څخه مننه کړې او د طالبانو او بیجینګ ترمنځ د اړیکو پر دوام او پراختیا یې ټينګار کړی دی.
حنفي چین د افغانستان مهم ګاونډی بللی او له دغه هېواده یې غوښتي چې په امنیت شورا او نورو نړیوالو ناستو کې یې ملاتړ وکړي.
