۸صبح، کابل: د افغانستان د خبریالانو مرکز وايي، د طالبانو له واکمنېدو راوروسته شاوخوا ۳۰۰ خبریالان او د رسنیو کارکوونکي د دغې ډلې سختدرېځو رسنیزو لارښوونو ته د نه پاملرنې په تور نیول یا زنداني شوي دي.
دغه مرکز سهشنبه د تلې پر ۷مه په یوې خبرپاڼې کې ویلي چې په دې موده کې په افغانستان کې د رسنیو پر فعالیتونو پراخ محدودیتونه لګېدلې دي.
د خبرپاڼې پر بنسټ، لسګونه رسنیو هم د بېلابېلو لاملونو او کاري محدودیتونو د زیاتېدو له امله خپل فعالیتونه درولي یا تړل شوې دي.
د افغانستان د خبریالانو مرکز زیاته کړې چې پر رسنیو لګېدلي محدودیتونو د خبریالانو او رسنیزو کارکوونکو فعالیتونه سخت کړي دي.
یاد مرکز پرون خبر ورکړی و چې په هېواد کې اطلاعاتو ته د خلکو د لاسرسي حق له بېسارې ځپنې سره مخ شوی او په عملي توګه له منځه تللی او طالبانو په سیستماتیک ډول محدود کړی دی.
