۸صبح، کابل: د طالبانو د بهرنیو چارو وزیر امیرخان متقي په افغانستان کې د قطر له سفیر مردف القاشوطي سره پر دوه اړخیزو اړیکو غږېدلی دی.
د طالبانو د بهرنیو چارو وزارت سهشنبه د تلې پر ۲۱مه خبر ورکړی چې په دې لیدنه کې پر دوه اړخیزو اړیکو او له نړیوالې ټولنې سره د طالبانو د اړیکو په پیاوړتیا کې د قطر د اسانتیاوو پر برابرولو او هڅو بحث شوی دی.
د خبرپاڼې له مخې، متقي له نړیوالې ټولنې سره د طالبانو اړیکې مخ پر ودې بللې او په دې برخه کې یې د قطر هڅې ستایلې دي.
ورته مهال د قطر سفیر هم د خپل هېواد ژمنتیا او د دغو هڅو د دوام ډاډ څرګند کړی او په دې برخه کې یې رامنځته شوي پرمختګونه د هیله مندۍ وړ بللې دي.
