۸صبح، کابل: په سویس کې د افغانستان سفیر نصیراحمد اندیشه وایي، د دوحې له تړون او د طالبانو له بیا واکمنېدو پنځه کاله وروسته، په افغانستان کې د بشري حقونو او انساني کرامت حالت لا هم د خرابېدو پر لور روان دی.
نوموړي پنجشنبه د وږي پر ۱۹مه په خپله ایکس پاڼه کې لیکلي چې د ملګرو ملتونو د وروستي راپور پر بنسټ، افغانان، په ځانګړي ډول ښځې، نجونې او هنرمندان، د زدهکړو، کار او بیان د ازادۍ په برخو کې له کمسارو بندیزونو سره مخ دي.
هغه زیاته کړې چې له دغو بندیزونه سره سره، هنر په افغانستان کې د مقاومت او د خلکو د غږ د انعکاس په یوې وسیلې بدل شوی دی.
اندیشه ویلي چې په هېواد کې دننه او بهر افغانې هنرمندانې د خپلو هنري اثارو له لارې هڅه کوي خپل غږ تر نړیوالې ټولنې ورسوي.
هغه د ملګرو ملتونو د بشري حقونو شورا د ۶۳مې غونډې په څنډه کې د «غوړېدلي افغانستان» په نوم د یوه هنري نندارتون جوړېدو ته اشاره کړې او ویلي یې دي چې دا نندارتون د افغان ښځینه هنرمندانو د مقاومت، ټینګښت او هیلو غږ تر نړیوالو رسوي.
