۸صبح، کابل: د کابل په لویدیځ «امید سبز» ښارګوټي کې سرچینې د سیمې پر اوسېدونکو د طالبانو د عدلیې وزارت له پرلپسې فشارونو خبر ورکړی او ویلې یې دي چې طالبان ورو ورو د دغه ښارګوټي د تخلیې په لټه کې دي.
سرچینو سهشنبه د تلې پر ۱۴مه ۸صبح ورځپاڼې ته وویل چې نن سهار طالبانو په دغه ښارګوټي کې د خلکو درې استازي نیولي دي.
سرچینې وايي چې عدلیې وزارت ته د دغو استازو له وړلو وروسته هغوی په کابل کې د طالبانو د والي دفتر ته پر لاره لادرکه شوي او تر اوسه یې د برخلیک په اړه معلومات نه شته.
ورته مهال سرچینې ټينګار کوي چې د عدلیې وزارت پورې اړوند جنګیالیو د امید سبز ښارګوټي اوسېدونکو ته خبرداری ورکړی چې له هر ډول اعتراضي راټولېدنې او په ښارګوټي کې د اوسني وضعیت له رسنیز کېدو ډډه وکړي.
دا په داسې حال کې ده چې تازه د طالبانو د عدلیې وزارت د ارزونې ډلې امر کړی چې د امید سبز ښارګوټي د جایدادونو مالکان دې د هرې کوټې څلور زره افغانۍ کرایه ورکړي.
