۸صبح، هلمند: په هلمند کې سیمهییزې سرچینې وايي، یو شمېر ځوانانو د طالبانو لهخوا پر موسیقۍ له بندیز وروسته په سمارټ مبایلونو کې د اپلېکېشنونو کارولو ته مخه کړې ده.
سرچینو دوشنبه د لړم پر ۱۸مه له ۸صبح ورځپاڼې سره په خبرو کې ویلي چې د موسیقۍ پر الو له بندیز وروسته، په هلمند کې ځوانانو د سندرو خپرولو او اورېدو لپاره بدیلې لارې غوره کړې دي.
د سرچینو په وینا، ځوانان د موسیقۍ خپرولو اپلېکېشنونه خپلو مبایلونو ته ډاونلوډ کوي او په خپلو محلې بانډارونو کې سمارټ مبایلونه له لوډسپیکرونو سره نښلوي او سندرې اوري.
هغوی وايي، د طالبانو د محدودیتونو سربېره دې لارې ځوانانو ته دا زمینه برابره کړې چې موسیقۍ ته لاسرسی ولري او په خپلو محفلونو کې سندرې خپرې کړي.
د هلمند اوسېدونکي وايي، دوی په دې سره هڅه کوي د موسیقۍ هنر ژوندی وساتي او د هنري فعالیتونو پر وړاندې له بندېزونو سره مقاومت وکړي.
د هغوی په وینا، پر موسیقۍ بندیز نه شي کولی دغه هنر چې د افغانستان د فرهنګ او هنري مخینې یوه برخه ده، له منځه یوسي.
دا په داسې حال کې ده چې طالبانو واک ته له بیا رسېدو وروسته پر موسیقۍ بندیز لګولی او په عمومې محفلونو کې یې د موسیقۍ خپرول او اورېدل منع کړي دي.
