۸صبح، کابل: د افغانستان د بشري حقونو په چارو کې د ملګرو ملتونو ځانګړي راپور ورکوونکي ریچارډ بېنېټ ویلي چې طالبانو د موسیقۍ او هنر په محدودولو سره د افغانستان د کلتوري تنوع او بډایه دودونو یوه برخه ځپلې ده.
بېنېټ دوشنبه د وږي پر ۱۶مه، د افغانستان په تړاو د خپل تازه راپور په خپرولو سره ویلي چې د موسیقۍ پر غږولو بندیز بېرته لګېدلی او په عامه ځایونو کې د موسیقۍ وسایل هم له منځه وړل شوي دي.
د بېنېټ په وینا، پر سندرې ویلو او شعر ویلو هم محدودیتونه لګېدلي او نور هنري فعالیتونه هم لا تر فشار لاندې دي.
هغه ویلي چې دغه محدودیتونه د طالبانو د هغو سیاستونو یوه برخه ده چې له مخې یې غواړي د افغانانو پر ژوند او کلتوري فعالیتونو لا ډېر کنټرول ولري.
