د بېپولې خبریالانو بنسټ د طالبانو مشر هبتالله اخوندزاده، د ۳۲ نورو کسانو او بنسټونو ترڅنګ د رسنیو د ازادۍ د دوښمنانو په کلني نوملړ کې شامل کړی دی.
دغه بنسټ دوشنبه د لړم پر ۱۱مه د خبریالانو پر وړاندې د جرمونو د بښنې د پای ته رسولو د نړیوالې ورځې په مناسبت، د ۳۳ کسانو او بنسټونو نوملړ «د رسنیو د ازادۍ دوښمنان» خپور کړی دی.
په دغه نوملړ کې د طالبانو د مشر ملا هبتالله اخوندزاده، د امریکا د ولسمشر ډونالډ ټرمپ، د روسیې د ولسمشر ولادیمیر پوتین، د اېکس ټولنیزې شبکې د مالک ایلان ماسک او د مېټا شرکت نومونه هم شته.
یاد بنسټ وايي چې دا کسان په بېلابېلو لارو، لکه د ناسمو تبلیغاتو خپرولو، خبریالانو ته په سپکاوي، د هغوی په زنداني کولو او ان وژلو سره د رسنیو ازادي تر برید لاندې نیسي.
د بېپولې خبریالانو بنسټ دغه نوملړ په پنځو برخو؛ سیاسي، امنیتي، حقوقي، اقتصادي او ټولنیزو وېشلی دی.
دغه بنسټ د طالبانو مشر هبتالله اخوندزاده د نوملړ په سیاسي برخه کې شامل کړی.
پر افغانستان د طالبانو له بیا واکمنېدو وروسته پر رسنیو او خبریالانو محدودیتونه زیات شوي دي.
ملا هبتالله اخوندزاده د ګڼو فرمانونو او لارښودونو په صادرولو د رسنیو پر فعالیتونو پراخ محدودیتونه لګولي دي.
مخکې هم د بېپولې خبریالانو بنسټ په یوه راپور کې ویلي و چې د طالبانو د واکمنۍ په لومړیو درېیو میاشتو کې د افغانستان ۴۳ سلنه رسنیو فعالیتونه درولي دي.
له ۱۲ زرو خبریالانو او د رسنیو له کارکوونکو څخه تر دوو برخو ډېرو یې خپلې دندې پرېښې دي.
دغه بنسټ د ۲۰۲۶ کال په اګست کې ویلي چې طالبانو د رسنیو د فعالیتونو د محدودولو لپاره تر ۲۰ ډېر لارښوونې او ځينې سیمهییز فرمانونه صادر کړي دي.
د طالبانو د امربالمعروف او نهی عن المنکر قانون هم د ژوندیو موجوداتو د انځورونو خپرېدل محدود کړي دي.
