د کندوز په حوزوي روغتون کې یو شمېر ناروغان د ځینو ډاکټرانو او نرسانو له چلنده شکایت کوي. دوی وایي د دغه روغتون کارکوونکي له ناروغانو اوناروغ لرونکو سره مناسب چلند نه کوي او ناروغان، د دې پر ځای چې په دغه روغتیايي مرکز کې روحي او رواني ارامتیا ترلاسه کړي، د ځینو ډاکټرانو او نرسانو د تاوتریخجن چلند له امله له لا نامناسب رواني وضعیت سره مخ کېږي.
یو شمېر هغه ناروغان اوناروغ لرونکي چې د کندوز حوزوي روغتون ته ورغلي دي، د دغه مرکز د ډاکټرانو او روغتیايي کارکوونکو له چلنده شکایت لري. دوی وایي د یو شمېر روغتیايي کارکوونکو چلند د طبي اخلاقو له اصولو او مسلکي کړنو سره اړخ نه لګوي او ناروغان، د روغتیايي خدمتونو د ترلاسه کولو او د درد د تسکینن پر ځای له سپکاوي او نامناسب چلندسره مخ کېږي.
یوه ناروغه چې په دې وروستیو کې دغه روغتون ته تللې ده، وایي: «خپل زوی مې روغتون ته یووړ. ډاکټر معاینه کړ او د درملو نسخه یې ورته ولیکله. کله چې د نسخې اخیستلو لپاره نرس ته ورغلم، زوی مې کانګې کولې، خو هغه له بل کس سره خبرې کولې، زما د ماشوم وضعیت ته یې هېڅ پام ونه کړ او له هغه ځایه ولاړ.»
دا مور زیاتوي: «نرس ته مې وویل چې د ماشوم وضعیت مې خراب دی، خو هغې په ځواب کې راپورې وخندل او ویې ویل: هېڅ هم نه کوم، څه کوې؟ او بیا یې وویل چې زه له جنجالي ناروغ سره کار نه لرم.»
بله مېرمن چې ورته تجربه لري، هم وایي د ځینو ډاکټرانو او روغتیايي کارکوونکو چلند د ناروغانو او ناروغ لرونکو له وضعیت سره مناسب نه دی. دا ټینګار کوي چې خلک د درملنې په هیله روغتون ته مراجعه کوي، خو د ارامۍ او مناسبې پاملرنې پر ځای، له نامناسب او ځوروونکي چلند مخ کېږي؛ داسې چلند چې د دې په وینا، د ناروغانو روحي او رواني درد نور هم زیاتوي.
دا مېرمن وایي: «ډاکټران اصلاً د ناروغ وضعیت ته پام نه کوي. که څه ووایې، پر ناروغ چیغې وهي. خپله ناروغه وم او روغتون ته ورغلم. ډاکټر په ملنډو را ته وویل: ولې په خپله راغلې یې؟ مګر د یوه ډاکټر دنده همدا نه ده چې د ناروغ درملنه وکړي؟ که یوه ښځه یا سړی په کور کې څوک ونه لري او ناروغ شي، بل کس له کومه کړي چې تر روغتون پورې ورسره ملتیا وکړي؟»
د بدخشان ولایت یو اوسېدونکي چې د درملنې لپاره دغه روغتون ته تللی دی، وایي: «وضعیت مناسب نه دی. هر څوک چې واسطه ولري، ژر یې درملنه کېږي. پر دې سربېره، د ډاکټرانو او نرسانو چلند له ټولو سره یو ډول نه دی؛ له ځینو سره ښه چلند کوي، خو له ځینو نورو سره مناسب چلند نه کوي. ناروغ مې درلود او هر ډاکټر ته چې ورغلم، سم ځواب یې نه راکاوه. دا ډول چلند ناروغ نور هم ناهیلی او خپه کوي. ډاکټران باید له ناروغانو سره مناسب چلند ولری څو د هغوی روحي او رواني وضعیت هم ښه شي.»
د یادولو ده چې دغه روغتون، د کندوز ولایت پر ناروغانو سربېره، د تخار، بدخشان او بغلان ولایتونو اوسېدونکو ته هم روغتیایي خدمتونه وړاندې کوي.
د کندوز اوسېدونکې نوا (مستعار نوم) وایي ځینې ډاکټران د هغو ناروغانو لپاره چې د دوی خپلوان وي یا پېژندګلوي ورسره لري، د روغتون له دننه وړیا نسخه لیکي؛ خو نورو ته، ان هغو کسانو ته چې د درملو د اخیستلو وس نه لري، له روغتون بهر نسخه لیکي څو درمل له شخصي درملتونونو ترلاسه کړي.
دا ادعا کوي: «کورنۍ، خپلوانو او هغو کسانو ته چې زړه یې پرې سوځي، د روغتون له دننه درمل ورکوي؛ که نه نو نه یې ورکوي.»
طالبانو تر دې وړاندې اعلان کړی و چې د دغه روغتون ظرفیت له ۲۵۰ بسترونو څخه ۴۰۰ بسترونو ته لوړ شوی او د تخصصي معایناتو لپاره پرمختللي تجهیزات او وسایل هم پکې چمتو شوي دي.
تر دې وړاندې هم د هېواد د بېلابېلو ولایتونو اوسېدونکو په درملنیزو مرکزونو کې د ځینو روغتیايي کارکوونکو له چلنده شکایت کړی و او ویلي یې وو چې له ناروغانو او ناروغ لرونکو سره د یو شمېر ډاکټرانو او نرسانو چلند نامناسب او ځوروونکی دی.
