د امریکا د ټاکل شوي ولسمشر ډونالد ټرمپ د لوړې مراسمو په درشل کې د روسیې ولسمشر ولادیمیر پوتین هغه ته د لوړې مبارکي ویلې ده.
سياېنبيسي دوشنبه د جنورۍ پر ۲۰مه راپور ورکړی چې پوتین د روسیې امنیت شورا په ناسته کې ویلي چې له ټرمپ سره د اوکرایین او اټومي تسلیحاتو په تړاو خبرو اترو ته تیار دی.
نوموړي د لنډمهاله اوربند په بدل کې په اوکرایین کې د اوږدمهاله سولې ډاډمنېدو لپاره پر خپلې ژمنې ټينګار کړی دی.
د یادونې ده چې ډونالد ټرمپ به په څو راتلونکو ساعتونو کې د امریکا اووه څلوېښتم ولسمشر په توګه لوړه وکړي.
ټاکلې ده چې په دې مراسمو کې د ایلان ماسک، جېف بېزوس او مارک زاکربرګ په ګډون پېژندل شوې څېرې ګډون وکړي.
څه موده وړاندې د کرملین ویاند دیمیتري پسکوف ویلي و چې ولادیمیر پوتین له ډونالد ټرمپ سره خبرو ته تیار دی.
