۸صبح، کابل: د افغان نجونو د زدهکړو فعالې او د افغانستان د رهبرۍ ښوونځي (SOLA) بنسټ اېښودونکې شبانې بسیج راسخ په اکسفورډ پوهنتون کې د افغان ښځو د تحصیلي بورسونو لپاره د ۲.۵ میلیونه ډالرو د ځانګړي کېدو خبر ورکړی دی.
مېرمن راسخ شنبه د تلې پر ۱۸مه په اېکسپاڼه کې لیکلي چې دا بورس د «وایدنفلډ ـ هوفمن» بنسټ په همکارۍ رامنځته شوی او هر کال به لږ تر لږه یوې افغانې ښځې ته د ماسټرۍ په کچه د زدهکړو زمینه برابروي.
د هغې په خبره، دا بورس د افغان ښځینه رهبرانو صندوق نومول شوی او د ماسټرۍ اړوند شرایطو پوره کوونکې لپاره به د تحصیلي دورې ټول لګښتونه پوښي.
د دغه بورس ترلاسه کوونکې به د خوراک، استوګنې او د محصلۍ د ځینو نورو لګښتونو لپاره کلنۍ مالي مرسته هم ترلاسه کړي.
دوی به د «وایدنفلډ ـ هوفمن» بنسټ په نوښت په یوه پراخ روزنیز پروګرام کې هم ګډون وکړي چې د رهبرۍ د وړتیاوو پر پیاوړتیا تمرکز لري.
راسخ ویلي چې نوموړې خپله هم په اکسفورډ پوهنتون کې د دغه بنسټ د بورس او رهبرۍ له روزنیز پروګرامه فارغه ده او دا مالي مرسته یې د افغان ښځو د زغم او زړورتیا د درناوي په موخه ځانګړې کړې ده.
دا بورس د هغو محصلانو لپاره په پام کې نیول شوی چې د ۲۰۲۷ کال په سپټمبر میاشت کې به په اکسفورډ پوهنتون کې خپلې زدهکړې پېلوې.
