د ۱۲ کلنې بيبي صدیقې کورنۍ ته نږدې سرچینې چې نږدې ۲۱ میاشتې کېږي د طالبانو په زندان کې ده، وایي چې د بادغیس په بالامرغاب ولسوالۍ کې طالب چارواکو د دغې قضیې د پای ته رسولو لپاره وړاندیز کړی چې له مخې به یې دغه نجلۍ د درېیو ورځو لپاره له خداینظر سره چې له نوموړې سره د واده ادعا کوي، په نکاح شي.
د دغو سرچینو په خبره، دا وړاندیز په بالامرغاب کې د طالبانو ولسوال کړی او موخه یې د شاکي د رضایت په ترلاسه کولو سره د شخړې پای ته رسول ښودل شوي دي. د بيبي صدیقې کورنۍ بیا دا وړاندیز رد کړی او دا یې له عدالت، قانون او انساني کرامت سره په ټکر کې بللی دی.
بيبي صدیقه هغه مهال چې ۱۲ کلنه وه، له خداینظر سره یې د واده ادعا یې ونه منله او د نږدې کسانو په خبره یې، هغې په وار وار ټینګار کړی چې د خپلې خوښې خلاف به جبري واده ونه کړي. له دې سربېره، طالبانو ورته دوسیه جوړه کړه او دا ماشومه له شاوخوا ۲۱ میاشتو راهیسې په زندان کې ساتل کېږي.
د دغې نجلۍ د خپلوانو په خبره، شاوخوا یوه میاشت مخکې چې د دې نجلۍ کورنۍ خبره رسنیزه کړه، طالبانو ادعا وکړه چې محکمه به دې موضوع ته جدي پام وکړي. د بيبي صدیقې کورنۍ وايي چې تر اوسه په دې برخه کې هېڅ عملي اقدام نه دی شوی او د دغې قضیې د ارزولو لپاره هېڅ پلاوی نه دی ګومارل شوی.
سرچینې زیاتوي چې د طالبانو د ژمنې خلاف، په بالامرغاب کې د استخباراتو ادارې د کورنې غړي، سیمهییز مشران او د سیمې اوسېدونکي تر فشار لاندې راوستي دي. د هغوی په خبره، د موریچاق کلي ځينې ځوانان هم د دغې قضیې له کبله نیول شوي دي.
د بيبي صدیقې کورنۍ وايي چې طالب چارواکو ترې غوښتي «بيبي صدیقه دې درې ورځې له خداینظر سره په نکاح کړي» او وروسته دې اختلاف د خبرو او دواړو غاړو د رضایت له مخې حل شي. د سرچینو په خبره، د دغې کورنۍ د رضایت خپلولو لپاره د پیسو ورکولو خبره هم شوې ده.
د نوموړې کورنۍ ټينګار کوي چې په ضمانت د صدیقې د ازادولو په اړه د طالبانو د تېرو حکمونو سربېره، دا نجلۍ لا هم په زندان کې ساتل کېږي. هغوی له رسنیو او د بشري حقونو له بنسټونو غوښتي چې په زندان کې د بيبي صدیقې د غږ خاموشولو مخنیوی وکړي.
هغه اسناد چې ۸صبح ورځپاڼې ته استول شوي، ښيي چې د طالبانو د سترې محکمې د لوېدیځ زون قضايي مرستیالې په یوه رسمي مکتوب کې په ضمانت د بيبي صدیقې د خوشې کولو امر صادر کړی دی. خو د دغې نجلۍ کورنۍ وایي چې له ضمانت سره سره، هغه ان د یوې ورځې لپاره هم له زندانه نه ده خوشې شوې.
همدارنګه، په یوه بل مکتوب کې چې یوه کاپي یې ۸صبح ته رسېدلی، ښکاري چې د بيبي صدیقې د کورنۍ له عریضې وروسته، د طالبانو محکمې یو ځل بیا د هغې د خوشې کولو پخوانی حکم، تایید کړی دی. د نوموړې کورنۍ ویلي چې ځايي طالب چارواکو تر اوسه دا حکمونه نه دي پلي کړي او بيبي صدیقه لا هم په زندان کې ده.
دا په داسې حال کې ده چې د بشري حقونو د فعالانو په خبره، د طالبانو «د زوجینو د تفریق اصولنامه» د «ماشومانو د ودونو» دودېدو ته لمن وهي. د دغې اصولنامې په پنځمه ماده کې پلار او نیکه ته د هغو نجونو د ودولو په اړه چې لا بلوغ ته نه دي رسېدلې، ځانګړي واکونه په پام کې نیولي دي.
په دې اصولنامې راغلي: «کله چې له پلار او نیکه پرته د نجلۍ نور خپلوان د صغیر یا صغیرې (باکره وي یا ثیبه [غیرباکره]) د کفو پر بنسټ او مهر مثل په بدل کې ترسره کړي، عقد سم دی، خو د صغیر یا صغیرې لپاره د بلوغ پر مهال د نکاح د فسخ کولو خیار شته. البته دا فسخ د محکمې په حکم کېږي.»
له دې مخکې په افغانستان کې د ملګرو ملتونو مرستندویه پلاوي (یوناما) د دغې اصولنامې له خپرېدو «ژوره اندېښنه» ښودلې او زیاته کړې یې ده چې «دا فرمان چې د زوجینو د تفریق اړوند اصول تدوین کوي، د افغان نجونو او ښځو د حقونو د کمزوري کولو پر لور یو بل ګام دی او په قانون او عمل کې سمبال شوی تبعیض بنسټيزوي.»
