۸صبح، کابل: سیمهییزې سرچینې وايي چې طالبانو کورنیو رسنیو او خبریالانو ته لارښونه کړې چې د دغې ډلې د ویاندویانو له اجازې پرته له پاکستان سره د نښتو خبرونه خپاره نه کړي.
سرچینو چهارشنبه د لړم پر ۶مه ۸صبح ورځپاڼې ته وویل چې دا لارښوونه د طالبانو د استخباراتو عمومي ریاست او سیمهییزو ویاندویانو له خوا خبریالانو ته اورول شوې ده.
د سرچینو په خبره، د طالبانو ویاندویانو امر کړی چې که د کرښې په اوږدو کې له پاکستان سره نښته وشي، رسنۍ دې له اجازې پرته په دې هکله هېڅ خبر نه خپروي.
سرچینې زیاتوي چې دا محدودیت د خبریالانو خواله شبکې هم رانغاړي او موخه یې له پاکستان سره د اړوندو خبرونو له خپرولو مخنیوی ښودل شوی دی.
دا په داسې حال کې ده چې بیګاه د پکتیکا په برمل ولسوالۍ کې د طالبانو او پاکستان ترمنځ نښته شوې خو کورنیو رسنیو او سیمهییزو خبریالانو یې په اړه راپور خپور نه کړ.
مخکې طالبانو له پاکستان سره د نښتو پر مهال د خپلو لاسته راوړنو په اړه خبرونه خپرول، خو سرچینې وايي چې اوس دا ډله هڅه کوي د نښتو اړوند خبرونو د خپرېدو مخه ونیسي او خلک له دغو پېښو ناخبره وساتي.
