۸صبح، کابل: په جرمني کې د «افغانستان – هامبورک» تر سرلیک لاندې د هامبورګ په پارلمان کې د طالبانو له پنځه کلنې واکمنۍ وروسته د افغانستان پر وضعیت، د ښځو او نجونو د حقونو او د افغانستان په اړه د جرمني د تګلارو د ارزونې پر موضوعاتو خبرې شوې دي.
دا کنفرانس یکشنبه د زمري پر ۲۵مه د هامبورګ د چپ ګوند له خوا او د افغانانو د مشارکت او د هزارهګانو د کلتوري او ورزشي بنسټ په همکارۍ جوړ شوی دی.
په دې غونډه کې د افغانستان سیاسي، ټولنیز او بشري وضعیت او د طالبانو د پنځه کلنې واکمنۍ پایلې ارزول شوې دي.
د هامبورګ په پارلمان کې د چپ ګوند استازې هیلې لطیفي د خبرو اترو پر ارزښت او د افغانانو وضعیت ته د نړیوالې ټولنې د پاملرنې پر اړتیا ټینګار کړی دی.
د جرمني د NDR شبکې خبریال پیتر هورنونګ هم د افغانستان او طالبانو په اړه د جرمني پر تګلارو بحث کړی او له طالبانو سره د اړیکو د عادي کولو په اړه یې خبرداری ورکړی دی.
نوموړي همدارنګه په جرمني کې د طالبانو د استازو حضور او د کډوالۍ او افغان پناهغوښتونکو په برخه کې له طالبانو سره د دغه هېواد د حکومت د تعامل پر څرنګوالي هم نیوکه کړې او د جرمني په پالیسۍ کې یې د لا روڼتیا غوښتنه کړې ده.
د کنفرانس جوړوونکو ویلي چې دغه کنفرانس په جرمني کې د افغان ټولنې د غړو، سیاسي استازو، د بشري حقونو او ښځو حقونو د فعالانو او خبریالانو ترمنځ د خبرو زمینه برابره کړې ده.
