۸صبح، کابل: په کابل کې د ایران سفارت ویلي، چې د دغه هېواد د بشري مرستو یو کاروان د افغانستان د ختیځو سیمو د وروستیو سیلابونو له زیانمنو شويو خلکو سره د مرستې لپاره د نورستان ولایت مرکز پارون ښار ته رسېدلی دی.
دغه سفارت پنجشنبه زمري پر لومړۍ، په خپره کړې خبرپاڼه کې ویلي، چې دا مرستې د هغو کورنیو لپاره په پام کې نیول شوې دي، چې د سیلابونو له امله زیانمنې شوې دي.
د خبرپاڼې له مخې، په لېږل شویو مرستو کې تر ډېره اوړه او غوړي شامل دي، چې پر سیلابځپلو کورنیو به ووېشل شي.
د نورستان وروستیو سیلابونو د سیمې اوسېدونکو ته درانه مالي او ځاني زیانونه اړولي او بشري مرستو ته یې اړتیا ډېره کړې ده.
تر دې وړاندې د کډوالۍ نړیوال سازمان (IOM) هم خبرداری ورکړی و، چې د نورستان د سختو سیلابونو له امله زیانمنې شوې کورنۍ په بېړنۍ توګه سرپناه، د څښاک پاکو اوبو او خوراکي توکو ته اړتیا لري.
