۸صبح، کابل: د ملګرو ملتونو د کډوالۍ سازمان (IOM) ویلي چې د افغانستان په ختیځ کې زلزلهځپلې کورنۍ د دغه سازمان د مرستو په ترلاسي د خپل ژوند پر بیارغولو بوخت دي.
نوموړي سازمان سهشنبه د چنګاښ پر ۱۶مه راپور ورکړی چې د هالنډ د بهرنیو چارو وزارت په ملاتړ د سرپناه جوړولو لپاره د نغدي مرستو پروګرام، له زلزلهځپلو کورنیو سره مرسته کوي څو د ژوند لپاره مناسب او غوره استوګنځایونه جوړ کړي.
د کډوالۍ نړیوال سازمان ویلي چې د زلزلو له رامنځته کېدو څو میاشتې وروسته ډېری ځپل شوې کورنۍ لا هم عادي ژوند ته د بېرته ستنېدو لپاره هڅې کوي او بشري مرستو ته اړتیا لري.
نوموړي بنسټ زیاته کړې چې د سرپناه جوړولو لپاره نغدي مرستې، له لنډمهالو خېمو څخه خوندي او د انساني کرامت له مخې مناسبو کورونو ته د کورنیو د لېږد زمینه برابروي.
له دې مخکې هم ملګرو ملتونو ټینګار کړی و چې له زیانمنو کورنیو ملاتړ او د مناسبې سرپناه برابرول، په افغانستان کې له طبیعي پېښو وروسته د بیارغونې بهیر له مهمو لومړیتوبونو څخه دي.
