۸صبح، کابل: په افغانستان کې د ملګرو ملتونو د پراختیايي پروګرام (UNDP) استازي سټیفن روډریګز د طالبانو تر کنټرول لاندې د افغانستان بانک له لومړي مرستیال صدیقالله خالد سره د «وړو مالي تمویلاتو» په اړه خبرې کړې دي.
باختر خبري اژانس چهارشنبه د چنګاښ پر ۱۰مه راپور ورکړی چې صدیقالله خالد په افغاننستان کې د ملګرو ملتونو د پراختيايي پروګرام له فعالیتونو او د سټیفن روډریګز له هڅو مننه کړې ده.
د راپور له مخې، خالد ویلي چې د افغانستان بانک د وړو مالي تمویلاتو سکتور د ودې لپاره له ملي او نړیوالو ادارو سره په ګډه کار کولو ته ژمن دی.
نوموړي زیاته کړې چې د دغو خدماتو پراختیا د افغانستان په اقتصادي وده او د بېوزلۍ په کمولو کې مهم رول لوبولی شي.
ورته مهال په افغانستان کې د ملګرو ملتونو د پراختیايي پروګرام استازي سټیفن روډریګز د وړو مالي تمویلاتو د پياوړتیا په برخه کې د افغانستان بانک د مشرتابه او کارکوونکو همکاري او ژمنتیا ستایلې او هیله یې ښودلې چې په دې برخه کې همکارۍ دوام ومومي.
