۸صبح، کابل: امریکا ته د افغانانو د لېږد مرستندوی بنسټ (افغانايوک) اعلان کړی چې د امریکا د بهرنیو چارو وزیر مارکو روبیو په قطر کې د السیلیه کمپ د فعالیتونو د ۹ میاشتنی تمدید سند لاسلیکوي.
دغې ادارې چهارشنبه د تلې پر ۸مه، ویلي چې د دغې اډې د فعالیت تمدید «د افغان متحدینو لپاره یوه لاسته راوړنه» ده.
افغانايوک د دغه اقدام له امله له مارکو روبیو او د قطر له حکومته مننه کړې ده.
د دغې ادارې په وینا، په دغه کمپ کې ۱۰۳۹ افغانان ژوند کوي چې ۷۲ سلنه یې ښځې او ماشومان دي.
افغانايوک زیاته کړې چې په دغه کمپ کې له پاتې کسانو تر ۱۵۰ زیات کسان د امریکايي پوځیانو د کورنیو غړي دي.
دغې ادارې ویلي چې په السیلیه کمپ کې شته ټول افغانان د امریکا د حکومت له خوا له امنیتی ارزونو تېر شوي دي.
دا په داسې حال کې ده چې د سې شنبې په ورځ، د سپتمبر پر ۲۹مه، د امریکا د کانګرس څلورو غړو د امریکا د بهرنیو چارو او کورني امنیت وزیرانو ته د یوه لیک په استولو سره غوښتنه وکړه چې په قطر کې د السیلیه کمپ پاتې پناه غوښتونکي دې د استثنا په پام کې نیولو سره امریکا ته ولېږدول شي.
